Kiyovu Sports ikomeje urugendo rwo kuzamuka ku rutonde nyuma yo gutsindira i Rubavu ikipe ya Etincelles ibitego bibiri ku busa (Etincelles 0 - 2 Kiyovu). Gutsinda uyu mukino byatuzamuye mu manota bitugeza kuri 24, bityo biduha icyizere ko gutsinda umukino utaha dufitanye na Mukura kuri uyu wa 6 i Huye byatuzamura ku rutonde tukagera ku mwanya wa 11 abo twegeranye baramutse bitwaye nabi.
Kiyovu Sports muri uyu mwaka w'imikino yabaye, kandi iri mu bibazo by'ingutu bikeneye ko twe twese Abayovu duhuriza hamwe imbaraga zacu, ubumenyi bwacu n'ubushobozi bwacu, bwaba ubw'ibitekerezo, bwaba ubw'amikoro, bwaba ubw'ibikorwa ndetse n'ubwo kuvuga rikijyana mu nzego zinyuranye kugira ngo tuyivane mu rwobo irimo.
Mu bihe bishize habaye byinshi bidutera kubabara, habaye byinshi tudashobora kwihanganira, bidutandukanya n'ikipe yacu dukunda, nyamara kuba kure ya Kiyovu biteye agahinda kabi, kandi ako gahinda karamutse kabaye akica katumara. Tureke guheranwa n'agahinda tugandukire ikipe yacu.
Niba koko Abayovu tuzi icyo dushaka, tugomba guharanira intsinzi ku mukino wa Musanze, kandi tukabikora mu nzira zose zishoboka, ariko ihatse izindi ni agahimbazamusyi tugomba guha abakinnyi bacu kuko batsinze umukino uheruka.
Iyo Kiyovu yatsinzwe ntangazwa kandi ngashavuzwa n'imijugujugu iterwa ubuyobozi bwa Kiyovu Sports, ku isonga President wayo, iyo mijugujugu kandi ubuyobozi bukayiterwa n'abakunzi ba Kiyovu mu gihe abo bayimutera aribo bakagombye kumubera ingabo imukingira.
